Размер шрифта: A A A
Цвет сайта: A A A A

Лизинг

Янгиланган сана:  14 Декабр 2020, 17:53

Лизинг хизматлари

“Туронбанк” АТБ томонидан банкнинг амалдаги Кредит сиёсати ва лизинг тўғрисидаги қонун ҳужжатларига мувофиқ лизинг хизматлари кўрсатилади. Унга кўра:

  • лизинг (молиявий ижара) - бир тараф (лизинг берувчи) иккинчи тарафнинг (лизинг олувчининг) топшириғига биноан учинчи тарафдан (сотувчидан) лизинг шартномасида шартлашилган мол-мулкни (лизинг объектини) мулк қилиб сотиб олишни ва уни шу шартномада белгиланган шартларда ҳақ эвазига эгалик қилиш ва фойдаланиш учун лизинг олувчига ўн икки ойдан ортиқ муддатга беришни назарда тутадиган ижара муносабатларининг алоҳида тури;

  • микролизинг - тадбиркорлик фаолиятини амалга ошириш учун Ўзбекистон Республикасининг “Микромолиялаш тўғрисида”ги қонунига мувофиқ 600 миллион сўмдан ошмайдиган суммада кўрсатиладиган лизинг хизмати.

“Туронбанк” АТБ томонидан тадбиркорлик фаолияти учун фойдаланиладиган истеъмол қилинмайдиган ҳар қандай ашёлар, шу жумладан корхоналар, мулкий комплекслар, бинолар, иншоотлар, ускуналар, транспорт воситалари ҳамда бошқа кўчар ва кўчмас мулк (ер участкалари ва бошқа табиий объектлар, шунингдек муомаладан чиқарилган ёки муомалада бўлиши чекланган бошқа мол-мулклар бундан мустасно)лар шартномада белгиланган шартларда ҳақ эвазига сотиб олиб эгалик қилиш ва фойдаланиш учун йиллик 20 фоиз устама ҳақ тўлаш шарти билан ўн икки ойдан ортиқ (лекин қонун ҳужжатларида белгиланган эскириш муддатининг 80 фоизидан ортиқ бўлмаган) муддатга лизинг олувчига лизингга берилади.

“Туронбанк” АТБ томонидан фақат лизинг шартномаси муддати тугаганидан кейин лизинг объекти лизинг олувчининг мулкига ўтишини кўзда тутувчи лизинг хизматлари кўрсатилади.

“Туронбанк” АТБ томонидан лизинг объекти лизингга берилиши учун лизинг олувчи томонидан камида 25 фоизлик олдиндан тўлов амалга оширилиши лозим.

Лизинг олувчи лизинг хизматидан фойдаланиш учун банкга қуйидаги ҳужжатларни тақдим этади:

  • ариза (аризада лизингга олиб бериш сўралаётган лизинг объекти ҳақидаги маълумотлар, бошланғич тўлов миқдори, лизинг суммаси, лизинг муддати кўрсатилиб, ариза раҳбар имзоси ва ташкилот муҳри билан тасдиқланган бўлиши лозим);

  • лизинг объектини ижара муддати давомида лизинг олувчининг банк ҳисобварағига пул тушумлари (пул оқими) прогнози кўрсатилган бизнес-режа;

  • лизинг олувчининг тегишли давлат солиқ инспекциясига тақдим қилган охирги ҳисобот даври учун бухгалтерия баланси (1-сон шакл), молиявий натижалар тўғрисида ҳисобот (2-сон шакл), 90 кундан ортиқ муддатдаги қарзларга доир солиштириш далолатномалари, янги ташкил этилган юридик шахслар бундан мустасно;

  • таъминотга доир ҳужжатлар (таъминоти сифатида мол-мулк гарови тақдим қилинаётган бўлса, мустақил баҳолаш ташкилотининг баҳолаш хисоботи, учинчи(юридик) шахс кафиллиги тақдим қилинса кафил ташкилотнинг охирги хисобот йилидаги молиявий ҳолати бўйича ижобий аудиторлик хулосаси);

  • агар лизинг олувчининг бошқа банкларда иккиламчи ҳисобварақлари мавжуд бўлса, у ҳолда ушбу банкларда амалга оширган пул айланмалари тўғрисида маълумот;

  • агар лизинг олувчи масъулияти чекланган ёки қўшимча масъулиятли жамият, ёхуд акциядорлик жамияти бўлса жамият уставига асосан берилган ваколатлардан келиб чиқиб, ваколатли органининг лизинг олишга розилиги.

  • лизинг ҳисобига сотиб олинадиган  лизинг объекти тўғрисида (техник) маълумотлар, шартнома лойиҳаси.

  • лизинг олувчининг давлат рўйхатидан ўтказилганлигини тасдиқловчи гувоҳномаси, низоми ва таъсис шартномаси ҳамда уларга киритилган ўзгартиришларнинг нусхалари (аввал банкка тақдим этилган бўлса банк ходими томонидан мижознинг юридик ишидан олинади);

  • лизинг олувчининг раҳбарлари (директори ва бош бухгалтери)нинг ишга тайинланганлиги тўғрисидаги буйруқларнинг кўчирмаси (аввал банкка тақдим этилган бўлса банк ходими томонидан мижознинг юридик ишидан олинади);

Белгиланган матнни тинглаш учун қуйидаги тугмани босинг By Speech