“Туронбанк” топ - менежменти Москвада!
Бизнес жараёнларни оптималлаштириш, мавжуд тизим ва дастурларни янгилаш эвазига технологияларни автоматлаштириш бўйича трансформация ишларини олиб бораётган Туронбанк бошқаруви, доимий тарзда ўз менежментининг тажриба ва кўникмаларини ошириб келмоқда.
Хусусан, “Тeam building” форматидаги ўқув дастурларининг 2023 йилги мавсуми МДҲ ва Европа хусусий бизнес муассасаларининг кучли рейтингларида етакчилик қилувчи “Сколково” Москва бошқарув мактаби билан бошланди. Туронбанк билан ўзаро ҳамкорлик доирасида жорий йилнинг январ, июнь ва апрел ойларида “Трансформация”, “Стратегик маркетинг” ва “Замонавий HR тизимини қўллаган ҳолда менежментга инвестиция киритиш” бўйича 2 та модулда 150 нафар банкирлар ўз тажриба ва кўникмаларини оширишди. Уларга Даниил Добрынченко, Егор Кривошея, Олеся Титова, Анна Семенова, Юлия Соснина, Виктор Шкипин, Елена Витчак сингари халқаро бизнес-коуч ва менторлар махсус тренинглар ўтишди.
Жорий йилнинг 26 - 28 август кунлари эса Туронбанкнинг барча ҳудудий бўлимларида фаолият олиб бораётган ходимлардан йиғилган 50 кишилик жамоа “Сколково” Москва бошқарув мактабининг бевосита Россия Федерациясида жойлашган кампусида малака ошириш имкониятига эга бўлишди. Айтиш керакки, қарийб 80 минг кв. метр майдонда жойлашган комплекс 2006 йилда ташкил этилган бўлиб, ўзига хос ноодатий дизайнга эга. Бугунги кунда бу ерда 20 турдаги йўналишлар орқали 130 дан ортиқ дастурлар бўйича тингловчилар ўқитилади. Туронбанк ходимлари ҳам “Лойиҳаларни бошқариш ва ўзгаришларни амалга ошириш” номли 3 - модул таълим дастурида иштирок этиш учун ўзларига бириктирилган аудиторияларда жам бўлишди.
26 – 28 август кунларига белгиланган ўқув – тренинглари одатий маъруза шаклида эмас балки интерактив усуллар билан “Академик блок”, “Амалиёт”, “Лойиҳа билан ишлаш” ҳамда “Умумий муҳокамалар” каби қисмларда бўлиб ўтди. Туронбанк ходимларига 20 йиллик тажрибага эга бизнес амалиётчи, “Сколково” Москва бошқарув мактабининг профессори Павел Алферов дарс ўтди.
Туронбанк жамоаси учун ажратилган махсус аудиторияда ходимлар бошқарув тизимларининг аҳамияти, лойиҳаларни баҳолаш ва ишчи гуруҳларни шакллантириш, мавжуд муаммоларни ҳал этиш усуллари, лойиҳада лидерларнинг ўрни каби кўплаб мавзуларда махсус сеинарларни тинглашаяпти ва ўзларини қизиқтирган саволларига жавоб олишди.
