Размер шрифта: A A A
Цвет сайта: A A A A

Халқаро кредит линиялари истиқболли лойиҳалар рўёбига йўналтирилмоқда

18 Jul 2019

 Инвестициявий лойиҳалар муваффақиятини таъминловчи омиллар кўп. Шулардан энг муҳими — бизнес учун қулай муҳит! Айни сабабдан, давлатимиз раҳбари томонидан ишбилармонларни қўллаб-қувватлаш, тадбиркорлар сафини кенгайтириш, ички бозорни импорт ўрнини босувчи ва экспортбоп маҳсулотлар билан тўлдириш чоралари кўрилаётир.

Мазкур жараёнда давлат ва жамоат ташкилотлари қаторида, мамлакатимиз молия муассасалари ҳам фаол иштирок этаётир. “Туронбанк” акциядорлик тижорат банки — шулардан бири. Мазкур молия муассасаси томонидан иқтисодиёт тармоқларига йўналтирилаётган мақсадли сармоялар ҳамда кичик бизнес вакилларига ажратилаётган кредит маблағлари аҳоли турмуш фаровонлигини юксалтиришга хизмат қилаётир. 

Эзгу мақсадларга — йирик сармоя

 “Туронбанк” АТБнинг хорижий кредит линияларини жалб қилиш ва уларни ўзлаштириш борасидаги саъй-ҳаракатлари эътирофга лойиқ. Ўтган йили ушбу банк томонидан Президентимизнинг 2018 йил 20 июндаги Халқаро тикланиш ва тараққиёт банки иштирокидаги “Ўзбекистон Республикасида мева-сабзавотчилик тармоғини ривожлантириш” лойиҳасини амалга ошириш чора-тадбирлари тўғрисида”ги қарорига асосан 25 млн. АҚШ доллари миқдорида кредит линиялари жалб этилгани сўзимиз тасдиғидир. Ҳозиргача ушбу маблағлардан 21 млн. АҚШ доллари, яъни 84 % ўзлаштирилди. Натижада бир қатор бизнес-режалар муваффақиятли рўёбга чиқарилди. Шулардан бири Навоий вилоятининг Қизилтепа туманида фаолият олиб бораётган “Адизбобо” фермер хўжалигига тегишлидир. Мазкур хўжалик замонавий технологиялар асосида 9,0 гектар ер майдонида иссиқхона ташкил этишни мақсад қилган эди. Аҳолини арзон нархларда сархил неъматлар билан таъминлашга қаратилган лойиҳа 2,6 млн. АҚШ доллари миқдоридаги маблағ ҳисобидан молиялаштирилди.

“Sag Agro Yakkabog’” масъулияти чекланган жамияти лойиҳаси ҳам-мазкур йўналишда. Кичик бизнес субъекти Қашқадарё вилоятининг Яккабоғ туманида интенсив усулда ёнғоқзорлар барпо этмоқчи эди. Бу бизнес-режанинг ҳар томонлама истиқболли эканлиги ҳисобга олиниб, МЧЖ 2 млн. АҚШ доллари миқдоридаги кредит билан таъминланди. Натижада корхона томонидан маҳаллий аҳоли вакиллари учун 135 та янги ишчи ўринлари яратиш имконияти пайдо бўлди.

Қишлоқ хўжалиги маҳсулотлари етиштириш баробарида, уни қайта ишлаш масаласи ҳам алоҳида эътиборда. Сурхондарё вилоятининг Олтинсой туманидаги масъулияти чекланган жамият шаклидаги  “East-West Surxon” қўшма корхонаси айни шу мақсадда ташкил этилди. Мазкур янги саноат субъектига мева-сабзавотни замонавий услубда қайта ишлашга мўлжалланган ускуналарни сотиб олиш учун 2 млн. АҚШ доллари миқдорида кредит ажратилди ва экспорт йўлга қўйилди.

Бизнесга барака кирса... 

Халқимиз орасида парранда — етти хазинанинг бири, чорва — хонадон баракаси, деган нақллар бор. Бу гаплар қанчалик ҳақиқатга тўғри келишини ушбу тармоқда бизнес фаолиятини йўлга қўйганлар яхши билишади. Энг муҳими, ушбу йўналишдаги тадбиркорлик давлатимиз ва халқаро молия муассасалари томонидан ҳам қўллаб-қувватлашмоқда. Президентимизнинг 2017 йил 17 сентябрдаги Халқаро тикланиш ва тараққиёт банки ва Халқаро тараққиёт уюшмаси иштирокидаги “Ўзбекистон Республикасида чорвачилик соҳасини ривожлантириш” лойиҳасини амалга ошириш чора-тадбирлари тўғрисида”ги қарори айни шу соҳа ривожига қаратилган. Унга асосан, 10 млн. АҚШ доллари миқдоридаги кредит линияси жалб этилган. Ҳозиргача ушбу маблағларнинг деярли асосий қисми — 9,1 млн. АҚШ доллари ўзлаштирилиб, бир қатор хайрли ишларга қўл урилди. Масалан, Сирдарё вилоятининг Мирзаобод туманидаги "Мирзаобод Аср Парранда" масъулияти чекланган жамияти 1,7 млн. АҚШ долларлик кредит ҳисобидан товуқ  сақлашга мўлжалланган 6 дона ускуна (несушка) сотиб олган бўлса, Самарқанд вилоятининг Булунғур туманида жойлашган “Жавоҳир Самарқанд Парранда Агрофирмаси” масъулияти чекланган жамияти 1,0 млн. АҚШ доллари миқдоридаги сармоя ҳисобидан паррандачилик тармоғини ривожлантиришга эришмоқда.

 “Milk Agro Alliance” МЧЖ Тошкент вилоятининг Зангиота туманида жойлашган. Корхона фаолияти наслли қорамолларни кўпайтиришга ихтисослаштирилган. Хориждан зотдор моллар келтириш эса катта маблағ талаб этади. Бу борада тузилган лойиҳа мутасаддиларга маъқул келиб, молиялаштириладиган бўлди. Шу мақсадда 936 минг доллар миқдорида кредит ажратилди. Ана шу саъй-ҳаракат 76 кишининг бандлигини таъминлаш имконини берганидан маҳаллий аҳоли вакиллари ҳам мамнун.

Илғор технологиялар — муваффақият гарови 

Модернизациясиз ривожланишга эришиш мушкул. Айниқса ишлаб чиқариш тармоқларида! Шу боис ишбилармонлар ўз саноат корхоналарини энг сўнгги русумдаги, энергия тежовчи, унумдор, юқори сифатни кафолатловчи технология ва дастгоҳларни харид қилиш пайидан бўлишади.

Давлатимиз раҳбари томонидан 2018 йил 16 октябрда имзоланган “Осиё тараққиёт банки иштирокидаги “Мева-сабзавотчилик тармоғида қўшилган қиймат яратиш занжирини ривожлантириш” лойиҳасини амалга ошириш чора-тадбирлари тўғрисида”ги қарорда ана шу жиҳатлар тўлиқ ўз ифодасини топган. Мазкур ҳужжатга мувофиқ, 40,0 млн. АҚШ доллари миқдорида кредит линиялари жалб этилиб, шу кунгача 23,2 млн. долларлик қисми ўзлаштирилгани қувонарлидир.

Чунончи, Сурхондарё вилоятининг Олтинсой туманидаги "BEST VEG" масъулияти чекланган жамияти ана шундай кўмакка муҳтож эди. Негаки, корхона ишбилармонлари мева-сабзавотни қайта ишлаш ускуналари сотиб олиш ҳаракатида эди. Шу мақсадда ажратилган 3,5 млн. АҚШ доллари маблағ уларнинг оғирини енгил қиладиган бўлди. Ёки Сирдарё туманида қад ростлаган "Jiansheng International Agricultural TechnologY" масъулияти чекланган жамиятига қарашли 3 гектарлик иссиқхонани инновацион технологиялар билан жиҳозлашга 1,0 млн. АҚШ доллари, "Zarafshon Grand Bog'lari" МЧЖнинг Навоий вилояти Кармана туманида 3 гектар ерда шундай илғор “ойнаванд дала” ташкил этиш лойиҳасига 2,1 млн. АҚШ доллари миқдорида маблағ ажратилди. Иссиқхона хўжаликлари ташкил этишга доир истиқболли лойиҳаларни молиялаштириш имкониятидан Самарқанд вилоятининг Каттақўрғон туманидаги "Қўшҳовуз" масъулияти чекланган жамияти (2,5 млн. АҚШ доллари),  Фарғона вилоятининг Тошлоқ туманида жойлашган "Боғбон Саркор" фермер хўжалиги (880,0 минг АҚШ доллари) ҳам баҳраманд бўлди.

Шунингдек, Қашқадарё вилоятининг Қарши шаҳридаги "Ширин Ният Барака" МЧЖ  4,5 млн. АҚШ долларлик кредит ҳисобидан гилосни саралаш ва қадоқлаш ускуналари, меваларни қайта ишлаш ускуналари ҳамда музлатгичли омборхона жамланмасини харид қиладиган бўлди.

 Эксимбанк (Хитой) кредит линияларини жалб қилиш борасидаги кўрсаткичлар ҳам эътиборга молик — 20 млн. АҚШ доллари. Ушбу кредит линия маблағлари ҳисобидан ишлаб чиқариш ускуналари, транспорт воситалари, махсус техника воситалари ва қишлоқ хўжалиги техникаларини сотиб олиш учун 17,2 млн. АҚШ доллари ўзлаштириб бўлинди ва аниқ мақсадлар учун ажратилди. 

Энергия таъминоти яхшиланади 

Бинобарин, Хитой Экспорт-импорт банкининг 58,5 млн. АҚШ доллари миқдоридаги кредит маблағларини жалб қилиш юзасидан келишув имзоланган ва амалий ишларга киришилган. Ушбу сармоялар  Президентимизнинг 2017 йил 2 майдаги “2017-2021 йилларда гидроэнергетикани янада ривожлантириш чора-тадбирлари дастури тўғрисида”ги қарори ижросига йўналтирилмоқда. Пировардида ўтган йили “Ўзбекгидроэнерго” АЖ таркибидаги ГЭСларни модернизация қилиш, янги кичик ГЭСлар қуриш лойиҳалари молиялаштирляпти. Қолаверса, мазкур банк билан имзоланган келишувга биноан, қўшимча 85,8 млн. АҚШ доллари миқдорида кредит жалб қилиниши ҳисобига республикамиздаги мавжуд 4 та ГЭСни модернизация қилиш ва 5 та кичик ГЭС қуришни молиялаштириш ишлари бошлаб юборилган. 2019 йилда “Ўзбекгидроэнерго” АЖ таркибидаги ГЭСларни модернизация қилиш, янги кичик ГЭСларни қуриш учун Хитойнинг Экспорт-импорт банкидан 40,7 млн. АҚШ доллари ва 24,8 млн. АҚШ доллари миқдорида кредит маблағларини жалб қилиш юзасидан музокаралар олиб борилмоқда.

Музокаралар давом этмоқда

Эришилган натижалар билан бирга, истиқболдаги режалар ҳам катта. Жумладан, келгусида Осиё тараққиёт банки кредит линиясидан 40 млн. АҚШ доллари, Хусусий секторни ривожлантириш ислом корпорацияси кредит линиясидан 10 млн. АҚШ доллари, Халқаро ислом савдо-молиялаштириш корпорацияси кредит линиясидан 6 млн. АҚШ доллари, Япония халқаро ҳамкорлик агентлиги кредит линиясидан 50,0 млн. АҚШ доллари, Жаҳон банкидан 40,0 млн. АҚШ доллари миқдорида маблағлар жалб қилиниши кутилмоқда. Германиянинг АКА Банкидан эса 12 млн. Евро кредит линия маблағлари жалб қилиниши режалаштирилган. Шунингдек, “Туронбанк” АТБ ва Халқаро қишлоқ хўжалигини ривожлантириш жамғармаси ўртасида 5 млн. АҚШ доллари миқдорида келишув имзоланиши арафасида турибди.

Албатта, ушбу хорижий кредит линиялари ҳисобидан жалб этилган маблағлар иқтисодиётимизнинг турли жабҳаларига йўналтирилиб, бозорларимиз тўкинлиги, аҳоли бандлиги ва нарх-наво барқарорлигига хизмат қилаётгани билан аҳамиятлидир. 

/ Манба: кўрсатилмаган / Кўришлар: 303
Белгиланган матнни тинглаш учун қуйидаги тугмани босинг By Speech