Туронбанк лидерлари мотивацион тренингда!
Доимий тарзда ўз устида ишлаш, мавжуд хатоларни таҳлил қилиб, жамоасининг психологик ҳолатини мунтазам барқарор даражада ушлаб туриш, лидерлардан талаб этилувчи энг муҳим омиллардан биридир. Бунда эса албатта раҳбар, ходимларининг ўзига ва ишига бўлган ишончини янада ошириши, уларни рағбатлантириши ва қўллаб – қувватлашнинг турли ҳил усулларини синовдан ўтказиши керак.
16 октябр санасида пойтахтдаги “Wyndham” меҳмонхонасида ўтган навбатдаги ўқув семинарида, Туронбанкнинг барча департамент ва мустақил бошқармалари раҳбарлари, Тошкент шаҳри ҳамда Тошкент вилоятидаги филиаллари бошқарувчилари, айни шу жиҳатларни тажрибали бизнес – мураббий ва кучли ментор Шоҳиста Пулатовадан ўрганишди.
“Ходимларга мотивация бериш” дея номланган тренинг интерактив тарзда, қатор профессионал методлар асосида жонли ва қизиқарли ўтди. Туронбанк лидерлари “Замонавий менежментни йўлга қўйиш учун нималарга эътибор қаратиш кераклиги”, “Энг омадли бошқарув усуллари”, “Ҳар бир мутахассис билан индивидуал ишлаш тизими” каби кўплаб мавзуларда амалий машғулотларни ўтказдилар.
Албатта, бу кўникмалар келгусида уларнинг иш фаолиятларида қўл келиб, ўз жамоаларини шакллантиришларида яқиндан ёрдам бериши аниқ. Тренинг якунлари бўйича иштирокчиларга махсус суртификатлар топширилди.
